بجامل ناس وبضحك عادي واتكلم
كاني مفيش في قلبي وجع وبتألم
وبتعامل كاني سليم وعال وتمام
وراضي بجرحي يمكن منه اتعلم
ولو فضفت يعني الناس هيهتموا
دة كل واحد شايل ومعبي من همه
وجواه جرح يمكن زيي ومخبيه
تشوفه الناس تقول مبسوط ويتخموا
وبتظاهر ما هو الظاهر ما بيبينش ايه جوة
وفي الايام دي لو شاطر تخبي الدمعة بالقوة
دا اقرب حد لو شافك بتبكي هيبكي اضعافك
وهيطبطب على اكتافك وهايقولك مسيرها تروق
احسن حاجة تتجمل في سكة كدبتك كمل
وخبي الدمعة واتحمل ضعفك مايشوفوش مخلوق
بحاول ابان سعيد دايما وبتعمد
وبعرف امتى اخلي مشاعري تتجمد
بمثل طب وايه يعنى اما اكون كداب
عشان ما يبانش حزني وقلبى متعود
اهو احسن ما اشكي واضعف وابكي واتكسر
ومش مستني حد بجرحي يتأثر
سيبوا اللي في قلبي متداري في خروجه عذاب
ساعات الضعف في الايام دي بيخسر
وبتظاهر ما هو الظاهر ما بيبينش ايه جوة
وفي الايام دي لو شاطر تخبي الدمعة بالقوة
دا اقرب حد لو شافك بتبكي هيبكي اضعافك
وهيطبطب على اكتافك وهايقولك مسيرها تروق
احسن حاجة تتجمل في سكة كدبتك كمل
وخبي الدمعة واتحمل ضعفك مايشوفوش مخلوق